سابق نگران وزیر اعظم سینیٹر انوار الحق کاکڑ نے اپنے دور وزارت عظمیٰ میں گندم کی خریداری کے فیصلے کی ذمہ داری قبول کرتے ہوئے کہا ہے کہ میں نے گندم کا معاملہ کبھی صوبوں یاکسی پر نہیں ڈالا اور میرے دور میں گندم کی خریداری کا جو فیصلہ ہوا اس کی پوری ذمہ داری لیتا ہوں انہوں نے کہا کہ گندم درآمد کے حوالے سے صوبوں نے پی ایم ڈی حکومت کو سمری ارسال کی گئی جس کے بعد ہماری نگران حکومت کے پاس یہ ڈیٹا آیا اور اسی کی بنیاد پر قانون کے مطابق گندم درآمد کی گئی انہوں نے کہا کہ ایک طرف ہم پر الزام لگایا جارہا ہے تو دوسری جانب خالص قانونی چیز (ایس آراو) کو غیر قانونی شکل دینے کی کوشش کی جارہی ہے ۔ امر واقعہ یہ ہے کہ گندم درآمد کرنے کے حوالے سے سابق نگران وزیر اعظم اور سینیٹر انوار الحق کاکڑ نے پی ڈی ایم حکومت کو بھیجی گئی جس سمری کا حوالہ دے کر سابق نگران وزیر اعظم جان چھڑانے کی کوشش کر رہے ہیں اس حوالے سے ان کی منطق کوکسی بھی طور قبول نہیں کیا جا سکتا اس لئے کہ اگر مذکورہ سمری پی ڈی ایم حکومت کی رخصتی کے بعد ان کی سربراہی میں قائم نگران حکومت کے پاس آہی گئی تھی تو سمری پر اتنی مدت گزرنے اور ملک میں گندم کا سیزن شروع ہونے سے پہلے ان کی حکومت نے سمری پر حالات کے مطابق نظر ثانی کیوں نہیں کی؟ دوسرے یہ کہ اجازت دینے سے پہلے کیا درآمد کنندگان کو اس بات کی بھی اجازت دی گئی تھی کہ وہ ناقص اور کیڑوںمیں لت پت گندم بھی درآمد کرکرے عوام کی صحت سے کھیلیں ، بہرحال یہ اتنا سادہ معاملہ نہیں ہے جس پرچپ رہا جائے یا پھر اس کو یوں ہی جانے دیا جائے اور اس حوالے سے جو انکوائری کمیٹی بنائی گئی ہے اس کی تحقیقات کے بعد ہی وثوق سے کچھ کہا جا سکے گا۔