پاکستان اور سعودی عرب کے مابین وادی نیلم میں70میگاواٹ بجلی کی پیداوار کے دو منصوبوں کی تعمیر کے معاہدوں پر دستخط ہوئے ہیں۔ اقتصادی ماہرین پاکستان کے معاشی بحران سے نکلنے کا واحد حل ملک میں غیر ملکی سرمایہ کاری بتاتے ہیں ۔عالمی سرمایہ کاری سے نا صرف برآمدات میں اضافہ کے باعث روپے پر دبائو کم ہو گا بلکہ نئے منصوبوں کی تکمیل سے عارضی اور مستقل روزگار کے مواقع پیدا ہونے سے مہنگائی اور بے روزگاری میں بھی خاطر خواہ کمی آ سکتی ہے یہی وجہ ہے کہ نگران حکومت نے عالمی سرمایہ کاروں کو پاکستان میں سرمایہ کاری پر آمادہ کرنے پر توجہ مرکوز رکھی اور سرمایہ کاروں کی رہنمائی کے لئے اعلیٰ سطحی خصوصی سرمایہ کاری سہولت کونسل بھی قائم کی۔ یہ حال ہی میں ختم ہونے والی نگران حکومت کی کوششوں اور آرمی چیف جنرل عاصم منیر کی ذاتی دلچسپی کا ثمر ہے کہ سعودی عرب نے وادی نیلم میں 10کروڑ 70لاکھ ڈالر مالیت کے منصوبوں پر دستخط کئے ہیں۔ سعودی عرب پاکستان میں 10ارب ڈالر کی سرمایہ کاری کا عندیہ دے چکا ہے جو گوادر اور سی پیک اقتصادی زونز میں ہونی ہے۔ حکومت ملک میں امن و امان کی صورتحال اور سیاسی عدم استحکام پر قابو پا لے تو پاکستان حقیقی معانی میں سرمایہ کاروں کی جنت بن سکتا ہے۔ بہتر ہو گا حکومت امن و امان کی صورتحال یقینی بنانے کے ساتھ سیاسی استحکام کے لئے بھی خلوص دل سے کوشش کرے تاکہ عالمی سرمایہ کاروں کا اعتماد بحال اور ملک معاشی دلدل سے نکل سکے۔