قومی اسمبلی کے اجلاس میں اپوزیشن کی ہنگامہ آرائی میں 7آرڈیننسز کی مدت میں120دن کی توسیع کی قرار داد منظوری دے دی گئی۔ واضح رہے کہ یہ آرڈیننسز نگران حکومت کے دور میں جاری کئے گئے تھے، جس پر پاکستان پیپلز پارٹی کے رکن اسمبلی قادر پٹیل نے ہی نقطہ اٹھایا تھا کہ نگران حکومت نے آرڈیننسز جاری کر کے اپنے آئینی اختیارات سے تجاوز کیا تھا، یہاں یہ امر بھی توجہ طلب ہے کہ آئینی ماہرین کے مطابق جب اسمبلی کا اجلاس ہورہا تو حکومت آرڈیننس جاری نہیں کر سکتی، اس سے مفر نہیں کہ حکومت نے اجلاس کے دوران آرڈیننس جاری نہیں کیے بلکہ پہلے سے نافذ العمل آرڈیننسز کی مدت میں توسیع کی ہے مگر یہ بھی حقیقت ہے کہ حکومت نے نگران حکومت کے آئینی حدود سے تجاوز کرتے ہوئے آرڈیننس کی منظوری کا مقصد نگران حکومت کے اقدامات کی توثیق کے علاوہ اور کیا ہو سکتا ہے جبکہ حکومت بھی یہ کام اسمبلی میں یہ بل پیش کر کے اور آئینی طریقہ کار کے تحت ان کو باضابطہ طور پر منظور کرا کر بھی کر سکتی تھی۔ حکومت کی جانب سے قانون سازی کے بجائے آرڈیننسز کی توسیع سے نہ صرف اپوزیشن بلکہ حکومت کی اتحادی جماعتوں کی مخالفت سے حکومت اقدام اخلاقی جواز کھو چکی ہے۔ بہتر ہو گا مسلم لیگ ن کی حکومت امورمملکت آرڈیننسز سے چلانے کے بجائے آئینی انداز میں قانون سازی کرے تاکہ اپوزیشن سمیت کسی جماعت کو حکومتی اقدامات پر اعتراض کا موقع نہ مل سکے۔