انتخابی میلہ

جن کو بھی اپنے علاوہ قوم کی خدمت کا شوق و ذوق ہے وہ ان دنوں خوب سرگرم ہیں، ایک دوسرے کے سر میں جوئیں تلاش کرتے ہیں، نکالتے نہیں۔ اپنی گزشتہ خدمات جتلاتے ہیں اور آئندہ موقع ملنے پر ہر ووٹر کی ہتھیلی پر جنت رکھنے کا وعدہ یوں اچھالتے ہیں کہ سیدھا ان کے ہی آنگن میں کیچ ہو جاتا ہے، خدا کرے کہ سیاست کو کارخیر سمجھ کر اسے کاروبار نہ بنایا جائے، اقتدار ایسی طاقتور چیز ہے کہ حکمرانوں اور ان کے حواریوں کے بے مثال کارنامے لوٹ مار کے، اقتدار سے باہر ہوتے ہی زبان زد عام ہو جاتے ہیں اور اس طرح یہ عوام دشمن واقعات ان کے کام آ جاتے ہیں جو قطارِ اقتدار میں آگے آگے لگے ہوتے ہیں۔گویا ایک کی برائی دوسرے کے کام آ جاتی ہے۔ دنیا بھر میں انتخابات ہوتے ہیں مگر جو رنگ رلیاں ہمارے انتخابی میلے میں ہوتی ہیں وہ کہیں اور کہاں؟ سچ تو یہ ہے کہ حسن اقتدار میں جو کشش اور منفعت ہمارے ہاں ہے اس نے 76برسوں سے یہاں کے غریب عوام کو خوشحال نہیں ہونے دیا، ہر شخص اپنی غلط بات کو صحیح ثابت کرنے کی کوشش ٹی وی ٹاک شوز میں یوں کرتا ہے کہ انتخابات سے پہلے اور بعد کی صورتحال واضح ہو جاتی ہے، 8فروری کا دن بھی آ ہی جائے گا، ہر پارٹی کویقین ہو نہ ہو کامیابی سے کسی نہ کسی انداز میں ضرورچپکنا ہے، کیونکہ جب قوم کی خدمت کا شوق عام ہو جاتا ہے تو سیاسی پارٹیاں بھی بے شمار ہو جاتی ہیں، کسی کے پاس بھی واضح اکثریت نہیں ہوتی اور ایک ایسی حکومت بنتی ہے جس میں کئی حکومتیں ہوتی ہیں، 76 برس ہوگئے حکومتیں بنتے، ارباب حکومت کی حالت بہترین ہوتے اور عوامی اکثریت کی حالت بد سے بدتر ہوتے، اسی کو انتخابی میلہ کہتے ہیں۔ دیگیں پکتی ہیں، ڈھول بجتے ہیں، ایک طبقۂ سیاست تو جلوۂ سیاست بھی ہے اس کے ہاں بھی بڑی رونقیں ہوتی ہیں، یہ میلہ تو نوے دن کے دوران ہی سج جانا تھا مگر سیاستدانوں کی فیلڈ کچھ اونچی نیچی تھی جوں ہی ہری جھنڈی لہرائی گئی اعلان ہوگیا،تاریخ مل گئی، اور تاریخ رقم ہوگئی۔

٭٭٭٭

یہودیت اور صہیونیت

امریکی صدر جوبائیڈن کہتے ہیں: اسرائیل نے جنگ بندی کی درخواست رد کردی۔ حیرت ہے کہ سپرپاور نے گزارش کی اور کھجور کی گٹھلی نے رد کردی، اب کہیے سپرپاور کون ہے اور کھجور کی گٹھلی........

© Daily Jang