آج 16نومبر ہے، ہماری ملکی سیاست اور قومی تاریخ کا ایک اہم ترین دن جب آج سے 35سال قبل 1988ء کے قومی الیکشن میں شہید ِ عوام ذوالفقار علی بھٹو کی عظیم صاحبزادی محترمہ بے نظیر بھٹو نے تیر کے انتخابی نشان پر بڑی کامیابی حاصل کرتے ہوئے وزارتِ عظمیٰ اپنے نام کی۔شہید بھٹو عوام کو طاقت کا سرچشمہ قرار دیا کرتے تھے تو پاکستان کے عوام نے بھی محترمہ کو بطور وزیراعظم منتخب کرکے انہیں نہ صرف پاکستان بلکہ مسلم دنیا کی پہلی خاتون وزیراعظم ہونے کے عظیم اعزاز سے نوازا۔اس امر میں کوئی دو رائے نہیں کہ محترمہ بینظیر بھٹو پاکستان کا ایک روشن جمہوری چہرہ تھیں، چاروں صوبوں کی زنجیر کہلانے والی بے نظیر ملک کے ہر حصے میں یکساں مقبول تھیں، محترمہ بے نظیر تہذیبوں کے تصادم کورد کرکے مفاہمت پر یقین رکھتی تھیں،وہ عوام کو درپیش مسائل کے حل کیلئے سنجیدہ تھیں، وہ سیاست کے میدان میں اعلیٰ اخلاقی اقدار کی علمبردار تھیں، وہ اس بات پر یقین رکھتی تھیں کہ زندگی چند روز کی ہے، اسلئے ہمیں مثبت سوچ کے ساتھ کچھ اچھا کرنا چاہیے، ہمیں لوگوں کے درمیان فاصلوں کو مٹانا چاہیے اور مثبت اندازِ فکر سے منفی قوتوں کو شکست دینی چاہیے۔ بی بی شہیدکی سب سے بڑی خواہش پاکستان سے غربت و افلاس کا خاتمہ کرکے ملک کو امن و ترقی کا گہوارہ بنانا تھی،وہ اپنے جلسوں میں کہا کرتی تھیں کہ’’میں شہید بھٹو کی بیٹی اپنے شہید بابا اور پاکستان کے عوام سے یہ وعدہ کرتی ہوں کہ برائی کے خلاف اور نیکی کی فتح کے لیے اپنی تمام توانائیاں وقف کر دوں گی اور مادرِ وطن کو مشکلات سے نجات دلانے کیلئے کسی قربانی سے دریغ نہیں کروں گی‘‘۔تاہم عوام کی خدمت کے جذبے سے سرشار محترمہ بے نظیر کی حکومت کو ایک سال کے مختصر عرصے میں گرانے کیلئے کچھ قوتیں متحرک ہوگئیں اور پھراگلے سال اکتوبرکے اختتامی ایام میں تحریک عدم اعتماد اسپیکرقومی اسمبلی کو جمع کرادی گئی۔ بطور تاریخ کے طالب علم ،مجھے آج بھی 23اکتوبر سے یکم نومبر 1989کے دن یاد آتے ہیں........

© Daily Jang