ایسا بوجھل وقت جب انسان یاسیت کی دھند میں گم ہوجاتا ہے : اس کی آواز خاموش ہو جاتی ہے ، توانائی کے سوتے بانجھ ہوجاتے ہیں، الفاظ اپنے معنی کھو دیتے ہیں اور سوچ بچار کی صلاحیتیں مفلوج ہوجاتی ہیں ۔ یہ ایسی کیفیت ہے جس میں انسان بہتری کے تمام احساسات سے عاری ہوجاتا ہے ۔ اگر میں کہوں کہ اس وقت ملک کے زیادہ تر لوگ اسی کیفیت کی گرفت میں ہیں تو مجھے یقین ہے کہ میں غلطی پر نہیں ہوں گا۔ طویل عرصے سے ہمارا نمو کا سفر تو رک چکا ، لیکن ہماری فکری گراوٹ کی کوئی حد نہیں ۔ یہ سیاہ باب ہر اس ناکامی سے زیادہ گھمبیر ہے جو اس وقت ہمارا احاطہ کیے ہوئے ہے ۔ ایسا نہیں کہ ہم ہمیشہ سے تہذیبی چکاچوند کے خواب دیکھا کرتے تھے ۔ یہ افق تو عرصہ دراز ہوا تاریک ہوچکا ۔ لیکن وقت گزرنے کے ساتھ ہم اپنے پائوں میں پڑی ان بیڑیوں سے رہائی پانے اور ان طوفانی لہروں سے نکل کرتازہ پانیوں میں سفر کرنے کی خواہش سے بھی محروم ہوچکے ہیں۔

ہوسکتا ہے کہ اس کی ایک بڑی وجہ ہماری اپنی خامیاںہوں ، لیکن حالات کو اس نہج پرڈھالنے میں اُس ماحول کا بھی بڑا کردار ہے جس میں ہم رہنے پر مجبور ہیں ۔ صبح، دوپہر ، شام، وہی گھن چکر، جیسے ہم کسی مشین کے پرزے ہوں اور اس حرکت پر ہمارا کوئی کنٹرول نہ ہو۔ ہم متحرک ہوتے ہیں ، چکر کاٹتے کاٹتے ، کچھ دیر بعد دبارہ اسی جگہ پہنچ جاتے ہیں جہاں سے ہمارا سفر شروع ہوا تھا ۔اس دوران نہ ہم کچھ سیکھتے ہیں ، نہ ہمارے علم میں کسی اضافے کی نوبت آتی ہے ۔

جمود چاہے مادی ہو یا فکری ، یہ جسم اور ذہن کے ہر حصے کو متاثر کرتا ہے جس کا تعلق ان پٹ سے ہے ۔ اس کا سفاک اثر جسمانی اور ذہنی صلاحیتوں کو مفلوج کردیتا ہے ۔جیسا کہ میں نے کہا ہے کہ ہوسکتا ہے کہ بڑی حد تک یہ ہمارا ہی کیا دھرا ہو، لیکن جب امید کا پہلو ہماری زندگیوں سے نکل جاتا ہے تو مہلک سکوت کی کھوکھلی صدائیں ہماری زندگیوںکے صحرامیں گونجنے لگتی ہیں ۔ یہ بانجھ پن رفتہ رفتہ تمام سماج کو نگل لیتا ہے ۔

وقت میں پیچھے جا کر........

© Daily Jang