چند دن پہلے افنان نامی جس نوجوان نے تیز رفتاری سے گاڑی چلاتے ہوئے لاہور میں ایک ہی خاندان کے چھ افراد کو ٹکر مار کر ہلاک کیا وہ نوجوان بھی لمز جیسے کسی اعلیٰ کالج میں پڑھتا ہے ۔نہ جانے کیوں مجھے لگتا ہے کہ اگر یہ نوجوان لمز والی تقریب میں ہوتا تودیگر بچوں کی طرح یہ بھی چبھتے ہوئے سوالات پوچھتا کہ جناب والا آپ دیر سے کیوں آئے ،آپ کی آمد پر ہٹو بچو کی صدائیں کیوں لگائی گئیں ، کیا اِس ملک میں قانون صرف عام بندے کیلئے رہ گیا ہے وغیرہ وغیرہ۔ اور پھر ہم لوگ اِس کی ویڈیو شیئر کرکے تالیاں بجاتے اور کہتے کہ واہ یہ ہوتا ہے شعور ، یہ ہوتی ہے بہادری ۔ مگر افسوس کہ اِس بچے کویہ موقع نہ مل سکا کیونکہ یہ اُس وقت ڈیفنس کے علاقے میں ’ریش ڈرائیونگ‘ کے ذریعے قتل کرنے کی پریکٹس میں مصروف تھا ! یہ پہلا حادثہ نہیں ہے اور نہ ہی آخری۔لوگ ایسے ہی مرتے رہیں گے اور خاندان اجڑتے رہیں گے تاوقتیکہ قانون کی وہ عملداری نہیں ہوگی جس کے تحت بغیر لائسنس کے گاڑی چلانے والے ڈرائیور کو سیدھا حوالات میں بند کر دیا جاتا ہے ۔ مگر یہ کام ہوگا کیسے؟

ویسے تو ٹریفک قوانین کی پاسداری کے حوالے سے ہماری کارکردگی کبھی قابل رشک نہیں رہی مگر گزشتہ پانچ دس برسوں میں ٹریفک کا جو حال ہم نے کردیاہے اسے دیکھ کر خوف آتا ہے ۔ٹریفک کے اشاروں اورون وے کی خلاف ورزی پہلے بھی ہوتی تھی مگر اب جس دھڑلے سے ہوتی ہے وہ کم از کم میں نے کسی اور ملک میں نہیں دیکھی۔کار اور موٹر سائیکل سوار رات کوبغیر لائٹ کے اندھا دھند ڈرائیونگ کرتے ہوئےاچانک سامنے آجاتے ہیں اور انہیں ذرہ برابر بھی پروا نہیں ہوتی کہ وہ کوئی غلط کام کر رہے ہیں بلکہ الٹا اگر آپ انہیں شرمندہ کرنے کی کوشش کریں گے توکوئی بعید نہیں کہ یہ غصے سےآپ پر ہی گاڑی چڑھادیں ۔رہی بات ٹریفک کے سنتری کی تو وہ بیچارہ زیادہ سے زیادہ اُنہیں پانچ سو روپے کا چالان تھماسکتا ہے۔ ٹریفک حادثات میں مرنے والوں کی شرح ہمارے ہاں خوفناک حد تک........

© Daily Jang