’’دراصل تم جانتے ہی نہیں کہ قیامت برپا ہو ئے سینکڑوں سال بیت چکے ہیں ، یہ دنیا جو تمہیں دکھائی دے رہی ہے مصنوعی ہے، اصل دنیا تو کب کی ختم ہوچکی!‘‘نامعلوم شخص نے کہا۔

’’اور تمہیں اِس بات کا کیسےعلم ہے ؟‘‘

’’کیونکہ میں نے جنت میں خدا سے التجاکی تھی کہ مجھے ویسی دنیا دوبارہ تخلیق کردے۔‘‘

’’اور خدا نے تمہاری بات مان لی؟‘‘

’’ظاہر ہے ، جنت میں تو ہر خواہش پوری کی جاتی ہے۔‘‘اُس نےاطمینان سے جواب دیا۔

اُس نامعلوم شخص کو پہلی مرتبہ میں نے بس اسٹاپ پر دیکھا تھا،اُس روز مجھے جلدی تھی اور میری کوشش تھی کہ سب سے پہلے میں بس میں سوار ہوجاؤں۔ یہ بس اسٹاپ میرے گھر کے قریب ہے اور کام پر جانے کیلئے میں یہیں سے بس میں سوار ہوتا ہوں،گزشتہ چند ماہ سے میرا یہی معمول ہے ، میں ٹھیک آٹھ بجے بس اسٹاپ پہنچ جاتا ہوں اور اکثر پہلی ہی بس میں جگہ مل جاتی ہے ،لیکن اگر رش زیادہ ہوتو پھر مجھے اگلی بس کیلئے مزید پندرہ بیس منٹ انتظار کرنا پڑتا ہے ۔یہ شخص روزانہ مجھ سے پہلے بس اسٹاپ پرموجود ہوتا تھا، شروع شروع میں تو میں نے اِس کی طرف کوئی خاص توجہ نہیں دی تھی لیکن بعد ازاں میں نےاِس میں دلچسپی لینی شروع کردی۔وہ ایک قبول صورت شخص تھااوراپنے رکھ رکھاؤ سے کسی پڑھے لکھے خاندان کا فرد لگتا تھا ، رکھ رکھاؤ میں نے اِس لئے کہا کہ وہ ہمیشہ سوٹ اور ٹائی پہن کر بس اسٹاپ آتا تھا اور میں نے کبھی اسے دھکم پیل کرتے ہوئے بس میں سوار ہوتے نہیں دیکھا تھا، اگر بس میں جگہ نہ ہوتی تو وہ اطمینان سے اگلی بس کا انتظار کرتا اور اُس وقت تک بس میں سوار نہیں ہوتا تھا جب تک پہلے سے موجود لوگ سوار نہیں ہوجاتے تھے۔لیکن بس اسٹاپ پر میرے علاوہ شاید ہی کوئی دوسرا آدمی ہو جس نے اُس نامعلوم شخص کی شائستگی کو نوٹ کیا ہو۔شاید میں بھی یہ بات نوٹ نہ کرتا مگر اُس شخص کی خوش لباسی نے مجھے اُس میں دلچسپی لینے پر مجبور کردیا۔دوسری بات جس نے مجھے اُس کی جانب متوجہ کیا وہ اُس کی اخبار پڑھنے کی عادت تھی، بس کا انتظار کرتے ہوئے وہ اطمینان سے بس اسٹاپ کے ستون کے ساتھ ٹیک لگا کر اخبار کی ورق........

© Daily Jang