متحدہ ہندوستان کی تقسیم کے 76 اور بنگلہ دیش کے قیام کے اکیاون سال بعد یہ حقیقت آشکار ہوگئی ہے کہ : جنوبی ایشیا بالخصوص پاکستان، بھارت اور بنگلہ دیش نہ تو پورپین یونین جیسا کوئی نیم وحدتی (ONENESS) علاقائی بندوبست قائم کرنے کی صلاحیت کے حامل ہیں، جس کا دائرہ افغانستان، نیپال، بھوٹان، سری لنکا اور مالدیپ تک بڑھایا جا سکے، نہ ہی پاکستان اور بھارت اپنی الگ الگ حیثیت میں علاقائی طاقتیں بن سکتے ہیں جو علاقے کے ممالک پر اثر انداز ہوسکیں اور نہ امریکہ اور کینیڈا جیسے پائیدار مثالی دو طرفہ تعلقات قائم کرنے کےاہل ہیں ۔اس بدقسمت خطے میں یہ بھی ممکن نہیں کہ اس کے سب ممالک اپنے ہی ریجن کے سب ممالک سے خوشگوار اور ثمر آور دو طرفہ تعلقات تو کیا معمول کے (نارمل) تعلقات ہی قائم کرسکیں۔ پاکستان اور بھارت دونوں ایٹمی قوتیں اور زیادہ آبادی والے بہترین مردم خیز ممالک ہونے کے باوجود امریکہ، چین حتیٰ کہ انڈونیشیا کے درجے کا بھی داخلی سیاسی و اقتصادی استحکام قائم کرنے کے اہل نہیں۔ کوئی شک نہیں بھارت کی قومی و ریاستی اقتصادیات جہاں تک عوامی اقتصادی حالت (مائیکرو اکانومی) کا تعلق ہے تیزی سے مستحکم ہو رہی ہے اور بنگلہ دیش بھی اپنے اہداف اطمینان بخش درجے تک حاصل کر چکا ہے، لیکن پاکستان سمیت تینوں ہی ممالک میں شرح غربت و غریب ترین درجے کا اتار چڑھائو (فلیکچویشن) قریب قریب رہتا ہے۔ جو آبادی کا بڑا فیصد ہوتا ہے۔پاکستان کی قومی سطح کی اقتصادی حالت (خصوصاً خزانہ) مسلسل آئینی و سیاسی عدم استحکام کے باعث بد سے بدتر ہوتی چلی گئی ۔ آج بدترین اور بھاری بھرکم قرضوں کی جکڑ بندی اور عالمی قرض داروں کی کڑی اور عوام کا دم نکالنے والی شرائط کے حوالوں سے تشویشناک ہے۔ بڑھتی غربت میں کمی کی بھی کوئی صورت نہیں بن رہی، اشیائے خورو نوش، بجلی، ایندھن اور پٹرول کی مسلسل بڑھتی قیمتوں سے گرتے معیار زندگی نے عوام کا بھرکس نکال دیا ہے، جس سے جرائم کی شرح اور داخلی بدامنی کا گراف بھی تیزی سے بڑھ رہا ہے۔ قرضوں کے غیر معمولی بوجھ نے معمول کی سست رفتار ترقی کو بھی جامد کر دیا ہے۔سو ہم علاقائی تعاون و اشتراک اور پائیدار دوطرفہ تعلقات سے بھی مہنگائی کا جن کسی حد تک قابو نہیں کرسکتے۔ روپے کی........

© Daily Jang