جوں جوں ساعتیں قدم بہ قدم آٹھ فروری کی جانب بڑھ رہی ہیں.... وہ تاریخ جسے الیکشن کمیشن آف پاکستان نے ملک میں عام انتخابات کیلئے مقرر کیا ہے، انتخابات سے متعلق غیر یقینی پن میں تکلیف دہ انداز میں اضافہ ہورہا ہے ۔ اس کا اظہاروفاقی سطح پر ملک کی سب سے بڑی سیاسی جماعت تحریک انصاف کو انتخابی نشان کی الاٹمنٹ میں ہونے والی تاخیر سے بھی ہوتا ہے ۔ قانون کے مطابق اس عمل میں سہولت فراہم کرنے کی بجائے دانستہ تاخیر کرنے کیلئے رکاوٹیں ڈالی جارہی ہیں ۔ بلکہ اس کا راستہ بھی روکا جارہا ہے۔ جماعتوں پر پابندی لگانے یا اُنھیں زبردستی سیاسی کردار ادا کرنے سے روک دینے کی روایت اس ملک میں نئی نہیں ۔ یہ وہ ملک ہے جو ایک حقیقی جمہوری ریاست بننے کی خواہش رکھتا ہے لیکن تاحال یہ خواب شرمندہ تعبیر نہیں ہوا۔ ایک قدم آگے ، دوقدم پیچھے کی طرف حرکت نے بے انتہانقصان پہنچاتے ہوئے اسے عالمی برادری میں ایک توانا اور ترقی پسند ملک بننے کی صلاحیت سے محروم کردیا ہے ۔ اس کی بجائے گزرتے ہوئے وقت کے ساتھ یہ ایک چبھتا ہوا مذاق بن کر رہ گیا ہے جس پر لوگ ہنستے بھی ہیں اور استہزا بھی کرتے ہیں۔ اس سے بھی بدتر یہ کہ کسی گہری خرابی کی مایوس کن علامت سمجھ کر ہمیں زیادہ تر دنیا نے نظر انداز کردیا ہے ۔ تقدیر کو تو ٹالا نہیں جاسکتا، جو ہونا ہے ، ہو کر رہے گا۔ لیکن ایک کام تو ہم کرسکتے ہیں : ایک ملک جو آزاد ہونے کا دعویٰ رکھتا ہے اور جس کی آبادی پچیس کروڑ ہے، اس میں ہم اتحاد اوراتفاق سے ایک شفاف جمہوری نظام قائم کرتے ہوئے موجودہ مایوسی کی فضا ، جس نے زندگی کے ہر پہلو کو اپنی لپیٹ میں لے رکھا ہے ، کو دور کرنے کا چارہ کرسکتے ہیں ۔ یہ سوچ بلاجواز نہیں ۔ طویل تاریخ ہے کہ کس طرح لوگوں کے حقوق غصب کیے گئے ، کس طرح اُنکے خواب چکنا چور ہوگئے، کس طرح ایک مجرم ٹولے نے ریاست کی سکت کو ناقابل تلافی نقصان پہنچایا۔ وہ ٹولہ جو بے رحمانہ طریقے سے تباہی اور بربادی کی........

© Daily Jang