جہاں دیکھیں وہی آڈیو لیکس کی گونج سنائی دیتی ہے۔ ہر آدمی آڈیو فارنزک کا ماہر بن چکا ہے مگر اتھارٹی دوچار لوگ ہیں۔ میں نے جب اس موضوع پر کچھ لکھنے کا سوچا تو ڈاکٹر فاتح الدین محمود کی بات کی۔ وہ اقوام متحدہ میں سائبر کرائمز پر مشیر رہ چکے ہیں۔ ایف آئی اے سائبر کرائمز ڈویژن میں چیف فارنزک آفیسر رہےہیں (ان کے مستعفی ہونے کے بعد یہ عہدہ ختم کر دیا گیا تھا) انہوں نےکرپٹون نامی ایک محفوظ ترین اسمارٹ فون بھی بنایا، جسے ہیک نہیں کیا جا سکتا، نہ ٹیلی کام چینل سن سکتے ہیں۔ آڈیو لیکس کے متعلق انہوں نے بتایا کہ اگلے وقتوں میں تکنیکی طور پر یہ دشوار کام تھا۔ آڈیو کال ٹیپ کرنے کیلئے ٹیلیفون لائنوں پر ہارڈ ویئر ڈیوائسز لگانا پڑتی تھیں مگر اب یہ کام سافٹ ویئر اور اسپائی ویئر کے ذریعے کیا جاتا ہے اور یہ انٹرنیٹ کی بدولت بآسانی ہر شخص کی رسائی میں ہے۔ انہیں خریدنے کیلئے ڈارک یا ڈیپ ویب پر جانے کی بھی ضرورت نہیں۔ انٹرنیٹ پر کئی کمپنیاں ہیں جو یہ اسپائی ویئر بطور سروس بیچ رہی ہیں۔ اس کا سورس کوڈ اور کمانڈ کنٹرول سسٹم وغیرہ کمپنیوں کے پاس ہوتا ہے۔ وہ صرف ایک حصہ خریدار کو بطور سروس بیچتی ہیں۔ اسے جب خریدار کسی کے فون پر انسٹال کرنے میں کامیاب ہو جاتا ہے تو اس میں موجود تمام فائلیں، آڈیو کالز، فون کا مائک اور کیمرا تک اس کمپنی کے کمانڈ اینڈ کنٹرول سسٹم کی گرفت میں آ جاتا ہے۔ خریدار جب چاہے، لاگ ان کرے اور تمام فائلیں اور کال ریکارڈنگ ڈاؤن لوڈ کر لے۔ وہ اگر چاہے تو براہ راست اس فون کا مائک آن کر کے یا کیمرےکو متحرک کر کےساری گفتگو سن سکتا ہے۔ جہاں وہ فون موجود ہے وہاں اس کے فرنٹ اور بیک کیمرا سے ویڈیو ریکارڈنگ بھی کی جا سکتی ہے۔ اب آڈیو کال ہیکنگ........

© Daily Jang