پاکستان کے خراب معاشی حالات کی ایک بڑی وجہ یہ ہے کہ گزشتہ 76برس میں یہاں نہ تو کوئی طویل المدت اقتصادی پالیسی تیار کی جا سکی ہے اور نہ ہی مختلف حکومتوں کی طرف سے تیار کئے جانے والے اقتصادی اصلاحات کے کسی ایجنڈے پر پوری طرح عمل درآمد ہو سکا ہے۔ حتیٰ کہ ملکی ترقی کے لئے شروع کئے جانے والے بہت سےاہم اقتصادی منصوبے بھی سیاسی مخالفت کی بھینٹ چڑھا دیئے گئے۔ علاوہ ازیں اقتصادی منصوبوں میں کرپشن اور کک بیکس کے حصول نے پاکستان کو اس مقام پر لاکھڑا کیا ہے جہاں اسے دنیا بھر میں ایک ناکام ریاست کے طور پر پیش کیا جاتا ہے۔ اگرچہ گزشتہ کچھ عرصے میں ارباب اقتدار نے معیشت کی بحالی کے لئے کچھ قابل ذکر اقدامات کئے ہیں۔ اس کی وجہ سے ناصرف زرمبادلہ کے ذخائر میں بہتری آئی ہے بلکہ غیر دستاویزی معیشت پر بھی زد پڑی ہے۔

تاہم اس کے باوجود اب بھی ملک کی معاشی حالت پوری طرح سنبھل نہیں سکی ہے اور حکومت کو اب بھی ریاست کے انتظامی معاملات چلانے کے لئے مقامی بینکوں اور عالمی مالیاتی اداروں سے قرض لینا پڑ رہا ہے۔ اگر یہ سلسلہ اسی طرح جاری رہتا ہے تو اس قرض کی ادائیگی اور درآمدات کے لئے زرمبادلہ کی کمی کو پورا کرنے کے لئے یا تو مزید قرض لینا پڑے گا یا پھر اس کے لئے پہلے سے ٹیکس ادا کرنے والے طبقات پر عائد مختلف ٹیکسز کی شرح میں مزید اضافہ کرنا پڑے گا۔

ہم گزشتہ 76 سال سے اسی دائرے میں گھوم رہے ہیں لیکن گزرتے وقت کے ساتھ یہ دائرہ مزید سکڑتا جا رہا ہے اور اس میں پھنسے ہو ئے ٹیکس دہندگان کو اتنا نچوڑا جا چکا ہے کہ اب ان میں مزید ٹیکس ادا کرنے کی سکت بھی ختم ہوتی جا رہی ہے۔ دوسری طرف ٹیکس نظام میں اصلاحات نہ ہونے کی وجہ سے بھی کمزور طبقات بری طرح متاثر ہو رہے ہیں۔ جنرل سیلز ٹیکس کے علاوہ پیٹرولیم مصنوعات اور بجلی و گیس پر عائد ٹیکس در ٹیکس کی وجہ سے مہنگائی تاریخ کی بلند ترین شرح کو چھو رہی ہے اور........

© Daily Jang