کچھ لوگوں کی الیکشن کمیشن سے محبت کی شدت کا جواب ہی نہیں، وہ صبح و شام اپنے ہاتھوں کی لکیروں میں انتخابی شکست دیکھ کر سارا پیار الیکشن کمیشن ہی پر نچھاور کرنے کے درپے ہیں۔ وقت پر ووٹر اور اسپوٹر کے در پر دستک دی ہوتی تو معاملہ تھوڑا مختلف ہوتا۔ ایک دفعہ پیار پیار میں اکبر الہ آبادی نے کہا تھا: ’’چشم جہاں سے حالت اصلی چھپی نہیں / اخبار میں جو چاہئے وہ چھاپ دیجئے‘‘

ہم تو کہتے ہیں صاحب، الیکشن کا جہاں اور ہے کمیشن کا جہاں اور۔ جس کو اپنا الیکشن چاہئے وہ عوام کی نبض اور خواہش کی رمز پر بھی ہاتھ رکھے۔ کوئی تو ہو جو عوام کو بےوقوف بنانے کے بجائے خان کے آغاز اور انجام کے درمیان والے شبانہ روز میں سعودیہ و ملائشیا ، امریکہ و روس، چائنہ و ترکی سے پاکستان کے تعلقات کی جما دینے والی ٹھنڈک کا جائزہ بھی مدنظر رکھے، کوئی تو ہو جو پی ڈی ایم کے آفتاب و ماہتاب قبلہ شہباز شریف کی تابکاریوں و طراریوں کی بھی تان چھیڑے۔ نغمہء بلبل اور ہے اور سیاسی ترانے کچھ اور۔اگر چھوٹے میاں صاحب میں دم خم ہوتا تو بڑے میاں صاحب کو سفری صعوبتوں کے تکلفات ہی سے نہ گزارا جاتا اور نہ قبلہ عمران خان ہی پارلیمان کے اعتماد کے عدم کا سامنا کرتے۔ مانا کہ آنگن بھی اونچا نیچا ہے لیکن ناچ کے ہر اسٹیپ ہی کیلئے بھی اتنا ٹیڑھا نہیں کہ محض آنگن ہی کو کوستے رہیں ، او بھائی خود احتسابی بھی کوئی چیز ہوتی ہے کہ نہیں؟ پھر، میڈیا کے راگ راگنی اور اوپر سے نیچے تک کے عادل جب تہیہ کرلیں کہ الیکشن منصفانہ کرانے ہیں تو کس کی مجال ( ویٹو پاور نکال کر ) انتخابات کے آئینے سے پہلوتہی کرے؟ اگر کوئی چشمِ بینا سے دیکھے گا تو معلوم ہوگا کہ بیوروکریسی اور پولیس ہی میں سب امراض نہیں تماشے کہیں اور بھی ہیں جنہیں شور و غل کے غلاف میں ڈھانپ دیا جاتا ہے، کوئی الیکشن کمیشن کے چیلنجز کو بھی تو آئیڈیل ازم کے آسیب کے سایوں سے باہر نکل کر دیکھے! الیکشن کمیشن نے دیگر اداروں کی مدد سے ، اور تفویض کار کے تناظر میں انتخابات کے عمل کو ترتیب دینی ہے جس میں فورسز اور عدلیہ کے علاوہ بالخصوص محکمہ تعلیم کا اہم........

© Daily Jang