بعض اوقات انسان ایسی مشکل ترین صورتحال سے دوچار ہوتا ہے کہ غلط اورصحیح میں فرق کرنا دشوار ہوجاتا ہے۔مسخ شدہ حقائق،متضاد معلومات،تشکیک سے بھرپور اطلاعات اور اصولوں کی من مانی تشریحات میں یہ فیصلہ نہیں ہوپاتا کہ جس لڑائی کو حق و باطل کا معرکہ بناکرپیش کیاجارہاہے ،اس میںکس فریق کی تائید وحمایت کی جائے؟یوں تو پاکستان میں اس نوعیت کی کشمکش کا آغاز 9مئی کو عسکری تنصیبات پر حملوں کے فوری بعد ہی ہوگیا تھا مگر اب فوجی عدالتوںمیں ٹرائل پر دیئے گئے حکم امتناع کو ختم کئے جانے کے عدالتی فیصلے کے بعد یہ بحث ازسرنو شروع ہوگئی ہے۔وہ جمہوریت پسند جو سویلین بالادستی کا پرچار کرتے ہیں ،بنیادی انسانی حقوق پر یقین رکھتے ہیں اور فوجی عدالتوں کے ہمیشہ سے مخالف رہے ہیں، ایک عجیب و غریب مخمصے کاشکار ہیں۔ تذبذب کاسبب یہ ہے کہ اپنے دیرینہ اصولی موقف کی روشنی میں تحریک انصاف کے ان کارکنان کے حق میں بات کریں جو کل تک خود ظالم و جابر شمار ہوا کرتے تھے یا پھر سیاسی مخاصمت کے پیش نظر فوجی عدالتوں میں ٹرائل کی کڑوی گولی نگل لیں؟مظلومیت کا پرچم تھامے طعنہ زنی کرنیوالے انصافیئے کہتے ہیں اب آپ حق پرستوں کی زبانوں پر چھالے کیوں پڑ گئے ہیں۔ ہمارے حق میں آواز کیوں نہیں اُٹھاتے؟ دیکھو، ہمیں کس طرح مشق ستم بنایا جارہا ہے؟اس کے ساتھ ہی یہ وعید بھی سنائی جاتی ہے کہ آج اگر تم ہمیں نہیں بچائو گے تو کل تمہارے ساتھ بھی یہی سلوک روارکھا جائیگا۔ کبھی کوئی انصافیہ13ویں صدی کے معروف اطالوی شاعر اور ادیب دانتے کا یہ قول سناتا ہے کہ ’’جہنم کی سب سے دہکتی ہوئی جگہیں ان افراد کیلئےمخصوص ہیں جو کسی بڑی اخلاقی کشمکش کے دوران غیر جانبدار رہتے ہیں۔‘‘تو کبھی کپتان کا کوئی متوالاجنوبی افریقہ کی نوبیل ایوارڈ یافتہ مصنفہ اور ادیب ناڈین گورڈیمر کی یہ بات یاد دلاتا ہے کہ ’’کوئی انسان سچ مچ زندہ ہو،نیوٹرل نہیں رہ سکتا۔‘‘اسی مہم جوئی کے دوران........

© Daily Jang