منصفانہ اور شفاف انتخابات ہمارا خواب ہی رہے ہیں۔ ہمارے بزرجمہر شفاف انتخابات کو اپنی ترجیحات کا حصہ بنانے کے بجائے اپنی مرضی اور منشا کے مطابق انتخابی نتائج دیکھنے کی خواہش رکھتے ہیں اور اسی تناظر میں وہ انتخابات کیلئے ماحول تیار کرتے ہیں۔ انتخابات سے پہلے ہی نتائج کے بارے میں روڈ میپ تیار کرنا، انتخابی نتائج کو اپنی مرضی کا رنگ دینا، کسی کی حمایت میں انتخابی ماحول بنانا ہمیشہ سے ہمارے مقتدر حلقوں کا شیوہ رہا ہے یہی وجہ ہے کہ انتخابی عمل کی ساکھ یا اس کی شفافیت پر ہمیشہ سوالات اٹھتے رہے ہیں۔ اس وقت ایک مرتبہ پھر 2024ء کے انتخابات کا شور ہے۔ لیکن اس مرتبہ انتخابات کو ’’شفاف‘‘بنانے کیلئے عدالت عظمیٰ کے ایوانوں میں بہت پھرتی دکھائی جا رہی ہے۔ میاں نواز شریف پر قائم مقدمات غیر معمولی پھرتی سے ختم کیے جا رہے ہیں، جبکہ عمران خان کو معمولی ریلیف دینے میں بھی لیت و لعل سے کام لیا جا رہا ہے۔ ایک طرف مسلم لیگ نون کو سازگار ماحول فراہم کیا جا رہا ہے تو دوسری طرف تحریک انصاف کیلئے زمین تنگ کی جا رہی ہے۔ اور یہ سب کچھ دھڑلے سے کیا جا رہا ہے اور دلیل یہ دی جا رہی ہے کہ 2018ء میں بھی تو یہی ہوا تھا۔ کسی غلط عمل کی توجیہ ایک اور غلط عمل سے کرنا بذات خود ایک نامناسب طرز عمل ہے لیکن ان دنوں طرز عمل یہی ہے۔ ایسے لگتا ہے کہ ایک کمزور جمہوری نظام اور کمزور حکومت کی تشکیل ہی ہماری مقتدرہ کی ترجیح ہے۔ ہمارا مجموعی سیاسی اور انتخابی نظام شفافیت سے دور ہے یہی وجہ ہے کہ لوگوں کا سیاست، جمہوریت اور انتخابات کی شفافیت پرسے اعتماد اٹھ رہا ہے۔ اگر ہم نے عام انتخابات کو محض ایک سیاسی مشق بنانا ہے تو نہ صرف یہ جمہوری نظام کیساتھ ظلم ہوگا بلکہ ملک کی بنیادیں بھی کھوکھلی کرنے کے مترادف ہوگا۔ یہ مشق 1951ء میں دہرائی گئی۔1960 ء میں........

© Daily Jang