ملک کو درپیش معاشی بحران سے نکالنے کا واحد حل یہ ہے کہ برآمدات بڑھائی جائیں۔ اس کیلئے جہاں برآمدات میں سب سے زیادہ حصہ ڈالنے والی ٹیکسٹائل انڈسٹری کو درپیش مشکلات ختم کرنے کی ضرورت ہے وہیں برآمدات میں فوری اضافے کیلئے دیگر شعبوں کی استعداد کار کو بڑھانا بھی ضروری ہے۔ اس حوالے سے آئی ٹی سیکٹر نہایت اہمیت کا حامل ہے کیونکہ اس شعبے میں برآمدات بڑھانے کے لامحدود مواقع موجود ہیں جبکہ اس کیلئے ٹیکسٹائل انڈسٹری یا دیگر پیداواری شعبوں کی طرح بہت زیادہ سرمایہ کاری کی بھی ضرورت نہیں ۔ یہ امر قابل ذکر ہے کہ پاکستان کی آئی ٹی کمپنیاں اور فری لانسرز پہلے ہی بغیر کسی بہت بڑی حکومتی مدد یا تعاون کے عالمی سطح پر اپنی صلاحیتوں کا لوہا منوا چکے ہیں۔ تاہم اب یہ ضرورت شدت سے محسوس کی جا رہی ہے کہ اس شعبے کو باقاعدہ ایک انڈسٹری کا درجہ دے کر اس کیلئے درکار "ایکو سسٹم " کو بہتر بنایا جائے۔

اس حوالے سے خوش آئند بات یہ ہے کہ اس وقت نگران وفاقی وزیر برائے انفارمیشن ٹیکنالوجی کا قلمدان ڈاکٹر عمر سیف کے پاس ہے جونہ صرف اس شعبے کے پوٹینشل سے آگاہ ہیں بلکہ انہیں اس سیکٹر کو درپیش مسائل کا بھی پوری طرح سےادراک ہے۔ انہوں نےوزارت کا چارج سنبھالنے کے بعد اس سیکٹر کی ترقی کیلئے مختصر عرصے میں گرانقدار اقدامات کئے ہیں۔ حال ہی میں انہوں نے حکومت پاکستان کی نمائندگی کرتے ہوئے سعودی عرب کے ساتھ ایک مفاہمتی یادداشت پر دستخط کئے ہیں جس سے پاکستان کی آئی ٹی کمپنیوں اور سٹارٹ اپس میں غیر ملکی سرمایہ کاری کی راہ ہموار ہو گئی ہے۔ اس ایم او یو کا مقصد مشترکہ منصوبوں، تربیتی پروگراموں اور جدید ٹیکنالوجیز کیلئے انوویشن سینٹرز، سینٹرز آف ایکسیلینس اور یونیورسٹی برانچوں کے ذریعے تحقیق اور جدت کو بڑھانا ہے۔ علاوہ ازیں دونوں ممالک اپنے فائبر آپٹک نیٹ ورکس، ڈیٹا سینٹرز اور کلاؤڈ کمپیوٹنگ کے رابطے کو بڑھا کر اپنے ڈیجیٹل انفراسٹرکچر کو بھی بہتر بنائیں گے۔ اس مفاہمتی یادداشت کے تحت پاکستان اور سعودی عرب........

© Daily Jang