’’اگر‘‘ایک ایسی اکسیر ہے جو ماضی کی چوٹوں کو سہلانے اور دل ناداں کو بہلانے کے کام آتی ہے۔مثلاً جب ہم وطن عزیز کے حالات پر کڑھتے ہوئے تنگ آجاتے ہیں تو دفعتاً خیال آتا ہے ،اگر قائداعظم کی ایمبولینس خراب نہ ہوئی ہوتی ،زندگی نے کچھ اور مہلت دیدی ہوتی تو پاکستان کی تاریخ مختلف ہوتی ۔اگر نواب لیاقت علی خان کی شہادت کے بعد خواجہ ناظم الدین وزیراعظم بننے کے بجائے گورنر جنرل کے منصب پر ہی براجمان رہتے تو ملک سیاسی عدم استحکام کا شکار نہ ہوتا۔اگر پہلے مقامی کمانڈر انچیف نامزد ہونے والے میجر جنرل محمد افتخار کا جہاز کراچی کے قریب جنگ شاہی میں گر کر تباہ نہ ہوتااور ایوب خان افواج پاکستان کے سربراہ نہ بنتے تو سیاست کے خیمے میں فوجی مداخلت کا اونٹ داخل نہ ہوپاتا۔اس طرح کے فیصلہ کن موڑ افراد واقوام کی زندگی میں بار بار آتے ہیں۔گاہے خیال آتا ہے لیفٹیننٹ جنرل امیر عبداللہ نیازی ڈھاکہ میں ہتھیار نہ ڈالتے اور واقعتاً آخری سپاہی اور آخری گولی تک لڑنے کا فیصلہ کرلیتے تو کیا ہوتا؟اگرذوالفقار علی بھٹو جنرل ضیاالحق کو آرمی چیف تعینات کرنے کی غلطی نہ کرتے یا پھر انہیں پھانسی نہ دی جاتی تو کیا پاکستان کی تاریخ مختلف ہوتی؟یوں تو ’’اگر‘‘کی گردان بہت طویل ہوسکتی ہے مگر اس تمہید کا مقصد ’’نئے پاکستان‘‘سے ’’پرانے پاکستان ‘‘میں واپسی تک کے سفر میں کپتان سے سرزد ہونے والی غلطیوں اور امکانات کا جائزہ لینا ہے۔جب حالات ناموافق ہوں ،نمبر پورے نہ ہوں تو عقل و خرد کا تقاضا یہ ہوتا ہے کہ اننگز ڈیکلیئر کردی جائے۔ جیسا کہ جنوری2018ء میں وزیراعلیٰ بلوچستان ثنااللہ زہری نے نوشتہ دیوار پڑھ لینے کے بعد عدم اعتماد کا سامنا کرنے کے بجائے استعفیٰ دے دیا۔اگر عمران خان بھی حالات کی نزاکت کو بھانپ لیتے ،عدم اعتماد کی قرار داد آنے سے پہلے قومی اسمبلی تحلیل کرکے عام انتخابات کا اعلا ن کردیتے یا پھر کسی قسم کی رکاوٹ ڈالے بغیر عدم اعتماد کا سامنا کرتے اور شکست ہوجانے پرچپ چاپ گھر چلے جاتے تو کیا ہوتا ؟چلیں ،مشیروں نے گمراہ کیا یا افتاد........

© Daily Jang