8؍فروری کے عام انتخابات میں ملکی سب سے مقبول جماعت پی ٹی آئی کو اسکی روایتی انتخابی شناخت ’’بلا‘‘ سے محروم کرکے ملک گیر پارٹی کو انتخابی عمل سے ہی باہر کردینے کا عدالتی ’’فیصلہ‘‘ بالآخر آگیا۔ جس تناظر ، پس منظر اور محفوظ ہونے کے بعد قوم کو انتظار کی سولی پر کھڑا کرکے جتنی تاخیر سے آیا اتنی پراسراریت میں لایا گیا کہپانچ مرتبہ فیصلے کا اعلان آگے بڑھایا گیا۔ گزشتہ جمعے کی رات 9 بجکر 25 منٹ پر پاکستان کے قاضی القضاۃ نے یہ فیصلہ سنایا جس کا مدعی خود پاکستان کا ایک اور بڑا آئین شکنی کا مرتکب ادارہ الیکشن کمیشن ٹھہرا۔ ایسا الیکشن کمیشن جس نے خود آئین کی صریحاً خلاف ورزی سے ملک میں اپنی واحد آئینی ذمے داری سے منحرف ہو کر الیکشن کے انعقاد کو ٹال کر خود کو واضح طور پر ملکی عملی سیاست کا ایک فریق بنا لیا۔ ایسے کہ انتخاب کو ملتوی کرنے کا حیلے بہانوں سے زور دار مطالبہ، پی ٹی آئی اور اسکی اسیر قیادت کی مسلسل تیزی سے ہوتی مقبولیت سے خائف ہو کر جماعت (تحریک انصاف) کی بڑی حریف ن لیگ اور اسکی اتحادی جمعیت علمائے اسلام کی طرف سے کیا گیا ۔ عملی صورت سینٹ کی وہ قرار داد ہے جس میں کورم سے ماورا 12 رکنی اجلاس میں خلاف روایت بعد از نماز جمعہ سینٹ کا ہنگامی اجلاس بڑے پراسرار ماحول میں ہوا جہاں ن لیگ کے سینیٹر ڈاکٹر افنان اللہ نہ جانے کس طرح پہنچ گئے؟ صرف اسلئے کہ قرار داد کی منظوری پر بظاہر اسکی مخالفت کرکے قوم کو یہ بھی تاثر دیا جائے کہ ن لیگ انعقاد الیکشن کی تائیدی ہے۔ ملین ڈالر سوال یہ ہے کہ اگر ن لیگی نمائندہ واقعی قرارداد کا سچا مخالف تھاتو اس نے قوم کو بیوقوف بنانے والی سہانی جمہوری مزاج کی تقریر جو کی تو مطلوب سے کم ترین کورم کی نشاندہی کرکے اجلاس ہی کیوں نہ ختم کرایا؟ (جو کہ عمومی پریکٹس ہے) ڈاکٹر افنان اللہ ملک کے کسی پسماندہ دور افتادہ علاقے کی نمائندگی نہیں کرتے جو اپنی سادگی اور کم تعلیم کےباعث ایوان کے رول آف بزنس سے زیادہ شناسا نہیں اور جو بالعموم اجلاس کی کارروائیوں میں زیادہ سرگرم نہیں ہوتے۔ افنان پی ایچ ڈی، سیاسی معاملات میں باشعور چوکس اور (اللہ بخشے) مرحوم مشاہد اللہ جیسے سرگرم سینیٹر کے سیاسی تربیت یافتہ فرزند ہیں۔........

© Daily Jang