ریاست انسان کی تخلیق کا اعلیٰ ترین مظہر ہے۔لیکن انسانی تاریخ گواہ ہے کہ ریاست اور اس میں بسنے والے عوام کے درمیان رشتے کو استوار کرنے میں کئی قوتیں حائل ہوتی ہیں اور صرف وہی سماج کسی نہج پر پہنچتا ہے جو ان قوتوں کے خلاف مسلسل مزاحمت کرتا ہے اور برسر پیکار رہتا ہے۔ غالبؔ نے اسی مزاحمت کے بارےمیں کیا خوب کہا ہے کہ!

دام ہر موج میں ہے حلقہ صدکام نہنگ

دیکھیں کیا گزرے ہے قطرے پہ گہر ہونے تک

غالب کہتے ہیں کہ جو قطرہ سیپی کے منہ میں چلا جاتا ہے ، موتی بن جاتا ہے لیکن ہر موج میں سینکڑوں مگر مچھ موجود ہوتے ہیں جو قطرے کو موتی نہیں بننے دیتے۔پاکستان اپنی76سالہ سیاسی تاریخ میں انہی مگر مچھوں سے نبرد آزما ہے اور یہ کہ ہمارا سماج نہ صرف ان قوتوں پر قابو پا نہ سکا بلکہ رفتہ رفتہ یہ قوتیں مضبوط سے مضبوط تر ہوتی چلی گئیں ، دوسری طرف یورپین معاشروں کے ارتقا نے یہ سبق دیا ہے کہ قطرے کو موتی بنانے کیلئے ضروری ہے کہ آئین، جمہوریت اور سیاست مسلسل ارتقا پذیر ہوتے رہیں تو ہی ایک فلاحی ریاست وجود میں آسکتی ہے۔

پاکستان اس رجحان کے برخلاف مسلسل سیاسی تنزلی کا شکار رہا ہے۔ اس سیاسی انحطاط کے عمل میں دوسرے اداروں کے ساتھ ساتھ عدلیہ نے بھی کئی بار ملک کے’’عظیم ترمفادات ‘‘کی خاطر جمہوریت ، آئین اور قانون کے تقدس سے انحراف کیا ۔ آئین ہر ملک کا بنیادی قانون ہوتا ہے جس سے دیگر باتوں کے علاوہ سیاسی ڈھانچہ بھی واضح کیا جاتا ہے۔ لیکن پاکستان میں کئی دفعہ آئینی ضوابط کو نظر انداز کرکے فوجی حکومتیں نافذ کی گئیں۔ اس کے علاوہ پاکستان کی تاریخ میں مارشل لا اور آئین کی بیک وقت موجودگی نے بھی سیاسی ماحول کو پنپنے سے مسلسل روکے رکھا۔ 1953ء میں گورنر جنرل غلام محمد نے وزیر اعظم ناظم الدین کی حکومت کو برطرف کر دیا اور اسکے کچھ عرصے بعد دستور ساز........

© Daily Jang