قومی انتخابات کے انعقاد میں دو دِن رہ گئے ہیں۔ الیکشن کی گہما گہمی آخری ہفتے میں داخل ہو چکی ہے۔ مگر ان انتخابات میں عوام کی وہ دلچسپی نظر نہیں آ رہی جو ماضی میں ہوا کرتی تھی۔ یہ بہت اہم اور سوچنے کی بات ہے کہ ایسا کیوں ہے۔ اس بار عوام میں عدم دلچسپی اور بیزاری کا رُجحان کیوں غالب ہے۔ اس بار مسلم لیگ (ن) اگرچہ بڑے جلسے کرنے میں سرفہرست ہے لیکن اس کا مطلب ہرگز یہ نہیں ہے کہ عوام اس جماعت کو کامیاب کرانے میں بھی تن من سے دلچسپی رکھتےہیں۔

اس میں کوئی شک نہیں کہ عوام سیاستدانوں سے مایوس ہو چکے ہیں۔ اور معاشی مشکلات کی وجہ سے عام آدمی کے لئے اہم ترین مسئلہ دو وقت کی روٹی کا ہے۔ عوام کو معاشی پریشانیوں میں مبتلا کرنے کے ذمہ دار یہی جمہوریت کے دعویدار سیاستدان ہیں جو اپنے مفادات کے حصول کے لئے عوام کو بھیڑ بکریوں کی طرح قربان کرتے ہیں۔ اب تک انتخابی جلسوں میں تقاریر اور اخباری بیانات کودیکھئے کہ کسی بھی سیاسی جماعت کے پاس ملکی مسائل بالخصوص معیشت کی بہتری، مہنگائی اور غربت کے خاتمے کے ساتھ ساتھ بے روزگاری سے نجات کا کوئی قابل عمل منصوبہ نہیں ہے جو عوام کے سامنے پیش کر سکے۔ کوئی موٹرویز اور میٹروز کے حوالے دیتے ہیں کوئی گھربنا کر دینے اور بینظیر انکم سپورٹ پروگرام کے حوالے دیتے ہیں اور سب کہتے ہیں کہ برسراقتدار آ کر وہ غربت و مہنگائی اور بے روزگاری کو ختم کر دیں گے۔ تین سو یونٹ تک بجلی مفت دی جائے گی اور یہاں تک کہ ماضی کی قیمتیں بحال اور مقرر کی جائیں گی۔ یہ سب کتنی غیرمنطقی باتیں ہیں جو کسی بھی طرح قابل عمل نہیں ہیں۔ ان سے کوئی یہ پوچھے کہ یہ سب کچھ کیسے اور کیونکر ہوگا۔ اس کا اُن کے پاس کوئی جواب نہیں ہے اور وہ یہ جانتے ہیں کہ ایسے سوالات کون سوچتا اور پوچھتا ہے۔ عوام بے چارے تو اتنے سادہ ہیں کہ ہر بات پر جب اسٹیج پر کھڑا کوئی شخص تالیاں بجانا شروع کرتا ہے تو جلسے کے شرکاء کو یہ اشارہ ہوتا ہے کہ تالیاں بجائیں۔........

© Daily Jang