نواز شریف جیل میں ہیں، ان کی سیاسی جاں نشین مریم نواز جیل میں ہیں، مسلم لیگ نواز کے اور بہت سے سرکردہ راہ نما زندانی ہیں، طلال چودہری، دانیال عزیز، نہال ہاشمی توہین عدالت کے مرتکب گردانے گئے اور نااہل قرار پائے ہیں، عدالتیں تہجد کے وقت تک اوور ٹائم لگا کر حنیف عباسی جیسے نواز شریف کے وفاداروں کو سزائیں دے رہی ہیں، نیب انجنیئر قمرالسلام جیسے کئی سرکشوں کو گرفتار کر چکی ہے، دو درجن سے زائد امیدوار آخری وقت پر مسلم لیگ ن کے ٹکٹ واپس کر رہے ہیں، محکمہء زراعت اپنی پسند کے بیج سے اپنی مرضی کی فصل کاشت کر رہا ہے۔ یہ سب کچھ راتوں رات نہیں ہو رہا، اس کے پیچھے سال ہا سال کی محنتِ شاقہ ہے، فیض حمید سے ثاقب نثار تک ریاست کے سب طاقتور لوگوں نے ایک دوسرے کے ہاتھ مضبوطی سے تھامے ہوئے ہیں، میڈیا پر نواز شریف کی حمایت میں بولنے والی ہر زبان گنگ کر دی گئی ہے۔ حضرات، یہ الیکشن 2018 ءپر اچٹتی سی ایک نظر ہے۔

پاکستان کا بچہ بچہ جانتا تھا کہ نواز شریف اور اس کی جماعت کو اقتدار سے طویل عرصہ تک باہر رکھنے کا فیصلہ ہو چکا ہے لیکن داد دیجیے مسلم لیگ کے ووٹر کو جو ان نامساعد حالات میں الیکشن والے دن گھر سے نکلا، پولنگ سٹیشن پہنچا اور پر امن انداز میں ووٹنگ میں حصہ لیا، اور اس کا نتیجہ یہ نکلا کہ پری پول رگنگ کے تمام اہتمام کے باوجود مطلوبہ نتائج کے حصول کیلئے پولنگ والے دن بھی بہت سی نازیبا حرکات کرنا پڑیں، RTS بٹھانا پڑا اور کئی پولنگ ایجنٹس کو ووٹوں کی گنتی سے باہر نکالنا پڑا۔ اور اس سب کے بعد پی ٹی آئی پنجاب میں نواز شریف سے الیکشن ہار گئی تھی۔ یہاں اتنی طویل تمہید باندھنے کا صرف ایک ہی مقصد ہے، پی ٹی آئی کے دوستوں کا حوصلہ بڑھانا، ان کی ہمت بندھانا۔دوستو، گھروں سے نکلو، ووٹ ڈالو، اپنے غصے کا پرامن اظہار کرو، نو مئی نہ کرو، آگ نہ لگائو، ووٹ کی طاقت سے........

© Daily Jang