عام انتخابات مکمل ہوتے ہی سیاسی جماعتوں نے ماضی کی طرح ایک دوسرے پر دھاندلی کے الزام لگانا شروع کر دیئے ہیں۔ اس حوالے سے کئی شہروں میں احتجاجی مظاہرے کئے ہیں اور آنیوالے دنوں میں یہ احتجاج مزید بڑھنے کا امکان ظاہر کیا جا رہا ہے۔ ہم وہ بدقسمت ہیں جو آزادی کے76 برس بعد بھی حکومت سازی کے جمہوری اور شفاف طریقے اختیار کرنے کی بجائے ان نتائج کو متنازع بنارہے ہیں۔ پاکستان کی انتخابی تاریخ میں آج تک کوئی ایسے الیکشن نہیں ہوئے جن میں ہارنے والے امیدواروں نےجیتنے والے امیدواروں پر دھاندلی کا الزام نہ لگایا ہو۔ ایک طرح سے یہ ہمارے ملک کا کلچر بن چکا ہے کہ اپنی شکست تسلیم کرنے کی بجائے اسکے جواز تراشے جائیں یا دھاندلی کا شور مچا کر انتشار کو ہوا دی جائے۔ اس حوالے سے الیکشن کمیشن یا دیگر ریاستی اداروں کو بھی بری الذمہ قرار نہیں دیا جا سکتا۔ انکی یہ ذمہ داری ہے کہ انتخابی عمل کو متنازع ہونے سے بچانے کیلئے بروقت اقدامات کریں اور نتائج کے بروقت اجرا کو یقینی بنائیں۔ تاہم الیکشن میں حصہ لینے والی سیاسی جماعتوں اور انکے امیدواروں کو بھی چاہئے کہ وہ سوشل میڈیا کے ذریعے لوگوں کو اشتعال دلانے اور احتجاج کی آڑ میں ہنگامہ آرائی کو فروغ دینے کی بجائے متعلقہ قانونی فورمز سے رجوع کریں۔ اس طرح نہ صرف ملک میں جمہوری روایات کو فروغ ملے گا بلکہ دھاندلی کے مرتکب عناصر کو بھی قانون کے کٹہرے میں لایا جا سکے گا۔

اس حوالے سے سیاسی قیادت کو ذمہ داری کا مظاہرہ کرنا چاہئے اس لئے بھی کہ ملک پہلے ہی سیاسی عدم استحکام کی وجہ سے معاشی بحران کا شکار ہے۔ ایسے میں اگر سیاسی انتشار جاری رہا تو معیشت کو مزید نقصان پہنچنے کا اندیشہ ہے۔ علاوہ ازیں وفاق اور صوبوں میں حکومت سازی کیلئے رابطوں اور جوڑ توڑ میں مصروف سیاسی جماعتوں کی یہ بھی ذمہ داری بنتی ہے کہ وہ حصول اقتدار سے زیادہ معیشت کی بحالی کو اپنی ترجیح بنائیں۔ موجودہ حالات کا تقاضا ہے کہ حکومت سازی کی متمنی سیاسی جماعتیں اقتدار حاصل کرنے سے پہلے کم........

© Daily Jang