ہمارے لاہور جیسی رونقیں اور کہاں؟تاہم اسلام آباد کی گہما گہمی بھی قابلِ دید تھی ،مری میں میٹھی سردی اور تیز ہواؤں کا سامنا کرنا پڑا مگر پارلیمنٹ ہاؤس کا نظارہ اُس سے بھی زیادہ تند و تلخ تھا البتہ ایوانِ صدر کی تقریب بے ذائقہ تھی۔ احسن اقبال اور رانا تنویر حسین سے ملاقاتیں اور باتیں خوشگوار تھیں مگر زیادہ لطف سابق سیکرٹری خارجہ ڈاکٹر اسد مجید خان سے ہونے والی ملاقات میں آیا ، ڈاکٹر صاحب اسے’’آف دی ریکارڈ‘‘ قرار نہ بھی دیتے تو کوئی مضائقہ نہ تھا کیونکہ وہ ایک منجھے ہوئے سفارت کار کی حیثیت سے ڈپلومیسی کا بخوبی ادراک رکھتے ہیں۔ کہاوت ہے کامیاب ڈپلومیٹ وہ ہوتا ہے جو تین گھنٹے بھرپور بحث کرے مگر کام کی کوئی چیز دوسرے کے پلے نہ پڑنے دے یاہتھے نہ چڑھنے دے۔ ‎یہ الگ بحث ہے کہ ان کا تحریر کردہ سائفر ایک سیاسی اناڑی لیکن ورلڈ کپ جیتنے والے کھلاڑی کے ہتھے چڑھ گیا تو اس نے کہا’’ میں اس سائفر کے ساتھ کھیلوں گا‘‘ مگر اس کھیل کھیل میں وہ خود اس کا المناک یا ٹریجڈی کردار بن گیا۔ ڈاکٹر اسد مجید کے اس سائفر کو بیچ میں ڈال کر وہ جس امریکا پر اپنی حکومت گرانے کا الزام عائد کر رہے تھے آج اُسی امریکہ سے ڈالروں کے عوض لابنگ پر مجبور ہے۔ بھٹو اور محترمہ بے نظیر کی رہائی کیلئے تو پھر بھی عالمی اپیلیں آتی تھیں آپ کیلئے وہ بھی کہیں سے نہیں آئیں۔‎یہ درویش کے بر عکس ڈاکٹر اسد مجیدبی جے پی کی مودی حکومت کےبڑے ناقد ہیں ،کہنے لگےکہ بڑی اچھی روایت چلی آرہی تھی کہ دنیا بھر میں جہاں بھی پاکستان اور انڈیا کا کوئی نیا سفیر آتا تھا تو ہر دوہمسایہ ممالک کے سفراء ایک دوسرے سے کرٹسی کال یا ملاقات کرتے، اس دو طرفہ تعلق سے علاقائی تعاون و استحکام میں ایک........

© Daily Jang