بات سادہ سی تھی، لیکن سنتے ہی میرے ہاتھوں کے طوطے اُڑ گئے اور ذہن کو وسوسوں نے گھیر لیا ۔ اب نیا شناختی کارڈ کیسے بنے گا ؟ کیا تھانے میں رپٹ درج کراﺅں کہ کارڈ فوجی چیک پوسٹ پر جمع کرایا اور وہیں سے غائب ہو گیا ؟ لاہور سے سو کلومیٹر دُور اِس کنٹونمنٹ کو خدا جانے پولیس سٹیشن کون سا لگتا ہے؟ استغاثہ دائر کروں تو اُس کی سماعت ملٹری کورٹ کرے گی یا سو ل عدالت ؟ چھاﺅنی میں داخل ہوتے ہوئے میزبان کی فون کال ، کوائف کی جانچ پڑتال اور شناختی دستاویز کی سپرداری سکیورٹی کی غرض سے تھی ، جو خوشی کی بات ہے۔ پر توقع نہیں تھی کہ چار گھنٹے میں واپسی پر حفاظتی چوکی پہ مامور باوردی جوان شیلف کے خانوں کو ٹٹول کرنیم دلی سے کہہ دے گا : ”آپ کا شناختی کارڈ نہیں ملا۔“ ”یہ تو ممکن نہیں۔“ ”جی سب کے ِمل جاتے ہیں ، آپ کا نہیں مِلا۔‘ ‘

کوئی چھوٹی موٹی انتظامی مشکل اچانک نازل ہو جائے تو مَیں بُردباری کی ایکٹنگ کامیابی سے کر لیتا ہوں ۔ انگریز دَور میں کچھ لوگ اِس اداکاری کو او ایل کیو کا تقاضا سمجھتے تھے، یعنی آفیسر لائیک کوالیٹیزیا افسرانہ اوصاف۔ چنانچہ پریشانی چھپا کر تحمل سے کہا ”بیٹا ، کارڈ یہاں سے گُم نہیں ہو سکتا ، آرام سے تلاش کیجئے۔ “ نوجوان نے کارروائی پھر مستعدی سے شروع کی۔ اب کے اُسے اپنے ایک اَور ساتھی کی معاونت بھی حاصل تھی ۔ اِس مرحلے پر مَیں نے دھیرے دھیرے یہ بھی پتا چلا لیا کہ کنٹونمنٹ میں داخل ہونے والوں کے شناختی کارڈ جب بائیں طرف جمع ہو کر سڑک کے داہنے ہاتھ واپسی والے بُوتھ میں پہنچتے ہیں تو انہیں کس ترتیب سے رکھا جاتا ہے ۔ جواب ملا کہ ناموں کے حروفِ تہجی اور متعلقہ ٹائم دونوں حساب سے۔ تلاش کا دوسرا دَور مکمل ہوا تو اعلان وہی تھا کہ ” کارڈ نہیں مِلا۔‘........

© Daily Pakistan (Urdu)