کم لوگوں کو علم ہو گا کہ جب علامہ اقبال کے استاد مولوی میر حسن کا انتقال ہوا تو اُس روز حکیم الامت کو نمازِ جنازہ میں شرکت کی خاطر لاہور سے سیالکوٹ کے لیے مال گاڑی پہ سفر کرنا پڑا تھا ۔ یہ تب کی بات ہے جب دونوں شہروں کے درمیان آنے جانے والوں کو وزیرآباد جنکشن پر ٹرین تبدیل کرنا پڑتی تھی ۔ تاریخ اپنے آپ کو دُہرا رہی ہے اور مدتوں پرانی ڈائریکٹ سفر کی سہولت ختم ہونے پر اب پھر وزیر آباد اسٹیشن پر ایک سے اُتر کر دوسری ٹرین میں سوار ہونا لازمی ہو چکا ہے۔ پر حضرتِ علامہ کے ساتھ کچھ اَور ہوا۔ اُنہیں ”چراغِ خانہ ءمرتضوی “ سے جو لگاﺅ رہا ، اُس کے ہوتے ہوئے استاد کی رحلت کا سُن کر وہ بھاگم بھاگ ریلوے اسٹیشن پہنچے ۔ مسافر گاڑی کے چلنے میں ابھی وقت تھا ۔ پتا چلا کہ ایک گُڈز ٹرین وزیر آباد کی سمت روانہ ہو رہی ہے ۔ ٹکٹ لیا اور اُسی میں سوار ہو گئے ۔

سیالکوٹ پہنچنے کی دیر تھی کہ ایک سوگوار خاتون نے اعلان کیا ”ساڈا اقبال تے آ گیا اے“ ۔ چونکہ اُنہی کا انتظار ہو رہا تھا ، اِس لیے چند ہی لمحوں میں جنازہ اٹھا لیا گیا ۔ ہم اِسے مقامی روایت کا روحانی پروٹوکول کہیں گے ۔ ظاہر ہے یہ اُس انتظامی پروٹوکول سے مختلف چیز تھی جس میں معمولی سی غفلت پر ڈی سی اور ایس پی تبدیل کر دیے جاتے ہیں ۔ پر کیا کروں کہ پاکستان کا خواب دیکھنے والا میرا شہردار بھی جب مال گاڑی پہ جا بیٹھا تو ظاہری حیثیت کے لحاظ سے وہ پنجاب مسلم لیگ کا صدر اور صوبائی اسمبلی کا منتخبہ رکن تو تھا ہی ، اُسے انگریز سرکار سے ’سر‘ کا خطاب ملے بھی چھ سال ہو چکے تھے ۔ تو کیا جعلی رکھ رکھاﺅ ہر سیاستدان کا مسئلہ نہیں ہوا کرتا؟ اور کیا روایتی پنجابی افسر کی مصنوعی تمکنت ہرموقع پر رعونت کی حدوں کو چھوتی نظر نہیں آتی؟