ان دنوں سرد ہواؤں کا راج ہے۔ یخ بستہ جھونکے جسم سے لپٹ کر دل میں کئی امنگیں جگا جاتے ہیں لیکن کارزارِ سیاست میں گرمی ہے اور سیاست کی یہ گرمی صرف انہی دنوں پر موقوف نہیں یہاں ہمیشہ ہی ایسا چلن رہا ہے اور سیاست؟ تو سیاست محبوبانہ طرز سے رقیبانہ سفر طے کر چکی ہے۔اس لئے اکثر سیاست دانوں کا شعار ہے کہ سیاست کو اپنے مقاصد کیلئے استعمال کیجئے ملکی ترقی۔ عوامی خوشحالی اور جمہوریت کے نام پر جمہور کو اس قدر مجبور کیجئے کہ یہ ایک مخمصے کا شکار ہوکر رہ جائیں انہیں معلوم ہی نہ ہو کہ کیا غلط ہے اور کیا صحیح اور درست غلط کے اسی کھیل میں سیاست دان سیاسی شطرنج کی چال چلتے جارہے ہیں جس میں سیاسی کھلاڑیوں کو کافی حد تک کامیابیاں ملتی رہی ہیں،ہر بار شکست صرف عوام کو ہوئی ہے اور شکست خوردہ عوام ہاتھ مل کررہ جاتے ہیں کہ عوامی مسائل جوں کے توں ہیں۔

ایسا نہیں کہ کسی مسئلے کا حل نہیں ہوتا بلکہ ایسا ہے کہ بعض اوقات ہم خود ہی مسائل کا حل نہیں چاہتے اور جب ہمارے اندھے اعتماد کے باوجود کوئی ہماری توقعات ہر پورا نہیں اترتایا ہمارے مسائل کا حل تلاش نہیں کرتا تو دل جس قدر دکھتا ہے اسکا اندازہ کوئی دوسرا نہیں کر سکتا، ہم پاکستان کے عوام کے ساتھ بھی کچھ ایسا ہی ہوا ہے کہ ہم,عوام, نے اپنے سیاسی رہنماؤں پر اندھا اعتماد کیا ہے اس قدر........

© Daily Pakistan (Urdu)