جب ہم چھوٹے تھے۔ تو ہماری والدہ محترمہ کہا کرتی تھیں، آپ لولے ہو، آپ کو دوسرے لوگ ٹھگ لیتے ہیں۔ ہمیں لولے کے معانی کا تو علم نہیں تھا۔ لیکن سمجھ جاتے تھے کہ ہم میں کسی چیز کی کمی ہے۔ ہم کم عقل یا سادے ہیں جب ہم بھائیوں کی شادیاں ہو گئیں تو پھر والدہ صاحبہ کہا کرتی تھیں کہ آپ لولے ہو آپ کی بیویاں آپ کو اپنے پیچھے لگا لیتی ہیں۔ دوسرے لفظوں میں "تھلے " لگا لیتی ہیں۔ تب تک ہمیں یہ بھی پتا چل چکا تھا کہ لولے یا لولی کا مطلب سادگی ہوتا ہے۔ یعنی ہماری ماں جی کے خیال سے ہم بہت سادے ہیں۔ جب ہم نے پہلی بار لولی پاپ کو دیکھا تو دل للچایا اور ساتھ ہی خیال آیا کہ اصل میں اس لولی پاپ سے ہی لفظ لولے یا لولی نکلا ہوگا۔ یعنی جو بندہ ایک ٹافی پر مر مٹے وہ سادہ ہی تو ہے۔ لولی پاپ پاکستان میں پہنچ کر پاپ سے پاک بن گئی ہوگی کیونکہ یہاں پاک چیزوں کو بھاگ لگتا ہے۔لیکن اب ہم سوچتے ہیں کہ صرف ہم نہیں بلکہ ہماری پوری قوم ہی لولی ہے۔ اسی لیے 76 برس سے اس قوم کو مقتدرہ اور سیاستدان ہر بار لولی پاپ دکھا کر اپنا مطلب نکالتے ہیں۔

ہمیں شروع دن سے لولی پاپ پر لگا دیا گیا تھا۔ بس ہر دور میں لولی پاپ کا رنگ بدلتا ہے۔ کوئی سوشلزم والا سرخ لولی پاپ دکھاتا ہے تو کوئی دائیں بازو والا سبز لولی پاپ کا اشارہ دے دیتا ہے۔ مگر مسئلہ یہ بھی ہے کہ لولی پاپ بھی نہیں دیتے بس دکھاتے ہیں۔ ورنہ لولی پاپ میں بھی کچھ میٹھا رس تو ہوتا ہی ہے۔ ہماری مقتدرہ، سیاستدانوں، مذہبی........

© Daily Pakistan (Urdu)