ہم توسمجھے تھے کہ لوگ صبح سویرے پولنگ سے تین گھنٹے پہلے پولنگ اسٹیشنوں پر لائنیں لگائے پولنگ شروع ہونے کا انتظار کررہے ہوں گے، بلکہ کئی من چلے تو رات سے ہی بوریا بستر لے کر پولنگ اسٹیشنوں کے باہر ڈیرے لگا چکے ہوں گے، چار سو پارٹی کے ترانے بج رہے ہوں گے جن کی دھنوں پر نوجوان تھرکتے ہوئے عمران خان زندہ باد اور آئی آئی... پی ٹی آئی کے فلک شگاف نعرے لگا رہے ہوں گے، ہر کسی نے عمران خان کے پوسٹر اٹھائے ہوں گے، مائیں بچوں کو لے کر اس سردی میں بھی کھلے آسمان تلے بیٹھی نظر آ رہی ہوں گی اور ان شیر خوار بچوں کے ہاتھوں میں بھی عمران خان کی تصویرہوگی مگر ایسا کچھ بھی نہیں دیکھا گیا۔

یہ داغ داغ اجالا یہ شب گزیدہ سحر

وہ انتظار تھا جس کا یہ وہ سحر تو نہیں!

پاکستانی میٹھی نیند کا مزہ لیتے رہے اور آرام سے اٹھنے کے موڈ میں رہے۔ ہو سکتا ہے خود عمران خان بھی رات کو سخت ورزش کر کے آدھا دن تک گہری نیند میں سوئے رہے ہوں۔ ٹی وی چینلوں پر ضرور ایک فضا بنانے کی کوشش کی گئی لیکن اس کا کوئی اثر تو تب ہوتاجب لوگ ان پر یقین کرتے اور ان کے کہے پر ووٹ دینے نکلتے۔

مری زبان کے موسم بدلتے رہتے ہیں

میں آدمی ہوں مر ا اعتبار مت کرنا