دہشت گردی کا اصل چہرہ پہچاننے کی ضرورت ہے۔ پاکستان میں جس طرح کے انتخابات ہوتے ہیں اس طرح کا ایک اور انتخاب اس سال 8 فروری کو بھی ہو گیا، اس کے متنازعہ نتائج سے اس وقت ملک میں سیاسی بحران کی صورت ہے، ہم توقع ہی کر سکتے ہیں کہ یہ بحران مزید نہ بڑھے اور اس کا کوئی مناسب حل تلاش کر لیا جائے گا۔ ہمیں ان انتخابات یا ان کے نتائج کے بارے میں کچھ نہیں کہنا کہ یہ ہمارے پسندیدہ مو ضوعات میں شامل نہیں ہیں۔ اس کا سرسری سا ذکر اس لئے کیا ہے کہ اس انتخابی عرصے میں خدشے کے عین مطابق کسی نہ کسی حد تک دہشت گردی جاری رہی،اس پر بات ضرور کرنی ہے اور ہمارے ملک میں ایک طویل عرصے سے گھٹتی بڑھتی دہشت گردی کا اصل چہرہ بے نقاب کرنا ہے۔

اگر آپ چاہیں اور اس کام کے لئے پوری طرح تیار ہوں تو آپ اصل چہروں تک رسائی حاصل کر سکتے ہیں، سچ پوچھیں تو میری طرح آپ بھی شاید ایسا نہیں چاہتے اور اگر چاہتے ہیں تو اس کام کے لئے پوری طرح تیار نہیں ہیں۔ شاید کا لفظ میں نے احتیاطاً استعمال کیا ہے کہ میں اس سلسلے میں اپنے وثوق کے اظہار سے ڈرتا ہوں، جس طرح میں حقیقت کی بھیانک تصویر دیکھنے سے پہلے ہی ڈر گیا ہوں آپ بھی چاہتے ہوں گے کہ زندگی آسان ہی رہے، اصل چہروں پر فریب کا پردہ پڑا ہی رہے تو بہتر ہے،اس حیرت کدے میں داخل ہو کر آپ کے وہ سارے تصورات چکنا چور ہو جائیں گے جو آپ نے اتنے عرصے سے سنبھال رکھے تھے اور کبھی آپ غلطی سے اِدھر جا نکلے تو آپ کا فوری تاثر یہ ہوگا کہ اس بستی کے شیشہ گر بہت بد لحاظ ہیں۔........

© Daily Pakistan (Urdu)