جاپان میں بسلسلہئ روزگارآنے والے تارکین وطن عمومی طورپرتنگ دستی کے عالم میں ہی یہاں پہنچتے ہیں اورابتدائی ماہ وسال مزدوری ومحنت کشی میں گزارتے ہیں۔ظفرحنیف کامعاملہ ذرامختلف تھا۔ جاپان آنے کے بعدپہلے تین روز اس نے ٹوکیوکے مہنگے ترین فائیوسٹارہوٹل پرنس میں گزارے تھے۔اس کے بعدسکونت کامناسب انتظام ہوگیاتوذاتی رہائش گاہ میں منتقل ہوگیا۔اصل بات تویہ ہے کہ میں نے اس سے ایک بار عہد کیا تھا، وعدہ تواس سے میرایہ تھاکہ دل ریستوران پر پورا مضمون لکھوں گا،جس ہوٹل کاوہ بانی اورروح رواں تھا، مگربدقسمتی سے وعدہ وفایوں ہورہاہے کہ اس دوست کا تعزیت نامہ لکھ رہاہوں۔بڑادلیرآدمی تھا۔ خوف کی ہڈی اس کے پورے جسم میں ایک بھی نہیں تھی، شومئی قسمت کہ ہڈیوں کے کینسر میں مبتلا ہو گیا۔ سبز آنکھوں،گھنی زلفوں، درازقد والے ظفر جیسے وجیہہ اورخوبصورت پاکستانی جاپان میں کم کم ہی پہنچے ہیں۔اگر شوبز میں چلا جاتا تو یقینا ایک مقبول ہیرو کے طورپرپہچان بنالیتا۔مجھے یہ کہنے میں تامل نہیں کہ وہ ایک عام آدمی تھا،مگریقین کیجئے قدرت کے اس کارخانے میں کوئی انسان بھی عمومی نہیں، ہرآدمی ہی خاص ہے،اورپھرمیرادوست توبہت ہی خاص تھا۔ باقی یہ ایک الگ بات ہے کہ وہ کوئی مشہوراورمقبول شخصیت نہیں تھا،پھربھی بے مثال تھا۔