ضمنی انتخابات کے نتائج نے پی ٹی آئی کی اکڑ توڑ دی ہے اور پس پردہ بہت کچھ ہونے لگا ہے لیکن ایسا نہیں ہو گا کہ عمران خان اس ماہ کے آخر میں جیل سے باہر آ جائیں گے۔ عمران خان تب باہر آئیں گے جب نواز شریف چوتھی مرتبہ وزارت عظمیٰ کا عہدہ سنبھالیں گے۔ اگر ضمنی انتخابات میں پی ٹی آئی کلین سویپ کرتی تو ضرور عمران خان اپریل میں ہی باہر آ جاتے۔ دراصل پی ٹی آئی اراکین اپریل میں عمران کے جیل سے باہر آنے کے بیانات دے ہی اِس لئے رہے تھے کہ جوش جذبات میں پارٹی ووٹر سپورٹر گھروں سے نکل آئیں اور پارٹی کو کلین سویپ کرنے میں مدد دیں۔ ایسا نہ ہوا اور اب پی ٹی آئی سدھائے ہوئے ریچھ کی طرح مداری کے اشارے پر ناچنے لگی ہے۔یہ عمل اگلے چھ ماہ تک ایسے ہی چلے گا اور دیکھنے والے لطف لیں گے۔ چھ ماہ بعد بہت کچھ ہو گا اور ممکن ہے اسی دوران عمران خان کو بھی کوئی ریلیف مل ہی جائے لیکن ان کی ناک میں جو نکیل ڈال دی گئی ہے، اس سے نجات ممکن نہیں ہو گی۔ بشریٰ بی بی بھی اشاروں کی زبان سمجھنے لگی ہیں اور تابعداری کا مظاہرہ کرنے لگی ہیں۔ ضمنی انتخابات کے نتائج نے پی ٹی آئی کے حلقوں میں خاک اڑادی ہے اور ہر کوئی اڑان بھرنے کو تیار نظر آتا ہے۔ پی ٹی آئی کو دوبارہ تیس نہیں بلکہ تین سیٹوں کی جماعت بنادیا جائے گا اور بلاول بھٹو کو کھل کھیلنے کا موقع ملے گا۔