اگر حافظے پر اعتبار کروں تو مرحوم طاہر اکرام سمیت گورڈن کالج کے کوئی دو سو طلبہ پیسنجر ٹرین میں چھتیس گھنٹے کا سفر کر کے جب کراچی کینٹ اُترے تو جنوری 1983 ءکے پہلے سوموار کا سورج طلوع ہو چکا تھا۔ نمایاں بات دو نو عمر اساتذہ سمیت کُل ہم سفروں کی تعداد نہیں بلکہ یہ پہلو ہے کہ اِن میں سے ٹکٹ، وہ بھی رعایتی، کالج کی ’لوک‘ روایت کی پیروی میں صرف اسّی طلبہ نے خریدے تھے۔ یاد رہے کہ اِس سفرِ کراچی سے کوئی پندرہ سال پہلے ہمارے ہی کالج کا ایک تفریحی دورہ پاک افغان سرحد کے قریب لنڈی کوتل سے واپسی پر راولپنڈی پولی ٹیکنیک کے راستے ایوب مخالف تحریک کا نکتہءآغاز بھی بنا۔ دونوں استادوں نے البتہ باضابطہ ٹکٹ لیے اور ذاتی آرام و سکون کی خاطر فرسٹ کلاس سلیپر کی بُکنگ مَیں نے اپنی جیب سے کرائی ۔ اِس میں دیانتداری کا مصنوعی زعم بھی شامل تھا۔ مگر ہوا کیا؟

ہمیں کالج سے رخصت کرنے کے لیے وائس پرنسپل مطیع اللہ خاں تشریف لائے تھے۔ اُنہیں دیکھ کر لڑکوں میں سے اسٹوڈنٹس یونین کا نائب صدر اپنی نیم دیہی اردو میں مجھ سے نیا مطالبہ کرنے لگا: ”سر، خاں صاحب سے کہہ کر ہمیں دس ہزار روپے اَور دلا دیں۔“ پیشہ ور ایڈمنسٹریٹر خدا جانے ایسے سوالوں کا کیا جواب دیتے ہیں۔ مَیں نے تو وائس پرنسپل کے سامنے اُنہی کے لہجے میں واول آوازوں کو گھماتے ہوئے کہا:”بیٹا، مَیں کَیسے کہہ سکتا ہوں اور خاں صاحب کَیسے دلا سکتے ہیں؟“ لڑکا چُپ تو ہو گیا لیکن جونہی پروفیسر مطیع اللہ خاں نے الوداعی خطاب کے لیے ’عزیز طالب علمو‘ کہا ، فضا میں ایک ایسی مسلسل ’اوں‘ گونجنے لگی جو ہونٹ ہلائے بغیر بس کالج کے لڑکے ہی نکال سکتے ہیں۔ اِس پر وائس پرنسپل کے صرف ایک جملے سے ہجوم کو سانپ سونگھ گیا تھا۔ فرمایا: ”یہ آپ کے حسنِ اخلاق کا بہت اچھا نمونہ ہے۔“