ആത്മവിശുദ്ധിയുടെയും പരസ്‌നേഹത്തിന്റെയും ആഘോഷമാണ്‌ പെരുന്നാള്‍. ഇസ്ലാം വിശുദ്ധിയെ പ്രാധാന്യത്തോടെയാണ്‌ കാണുന്നത്‌. ആന്തരികവും ബാഹ്യവുമായ വിശുദ്ധികളുണ്ട്‌. രണ്ടും പരിഗണനീയമാണ്‌. ഇസ്ലാമിന്റെ കര്‍മാനുഷ്‌ഠാനങ്ങളിലെല്ലാം ഈ സമന്വയതലം ദര്‍ശിക്കാം.
പൈശാചികമായ ദുര്‍ബോധങ്ങളും മോശം ചിന്തകളും മനുഷ്യഹൃദയത്തിന്റെ വിശുദ്ധിയെ കെടുത്തുന്നു. വിശുദ്ധിയുടെ അഭാവമാണ്‌ പലവിധ തിന്മയിലേക്കും മനുഷ്യനെ വഴിനടത്തുന്നത്‌. മനുഷ്യമനസില്‍ തിന്മ ആധിപത്യം നേടിയാല്‍ അതു കുടുംബത്തിനും സമൂഹത്തിനും പ്രയാസങ്ങളുണ്ടാക്കും. കളങ്കിതമായേക്കാവുന്ന ഇത്തരം ജീവിതപരിസരത്തുനിന്നു ശുദ്ധമായ ജന്മപ്രകൃതത്തിലേക്കു മനുഷ്യനു തിരികെ യാത്ര നടത്തേണ്ടതുണ്ട്‌. ഇതിനുവേണ്ടി സംവിധാനം ചെയ്യപ്പെട്ടതാണ്‌ റമദാനിലെ വ്രതം. മനസും ശരീരവും വെടിപ്പാക്കാനുള്ള തീവ്രയജ്‌ഞമാണത്‌. നോമ്പിലൂടെ വിശുദ്ധരായവര്‍ക്കു വന്നുചേരുന്ന ആത്മഹര്‍ഷ ദിനമാണ്‌ പെരുന്നാള്‍. ഉടയവന്റെ കല്‍പന ശിരസാവഹിക്കാനായതിലുള്ള ആത്മനിര്‍വൃതിയുടെ സന്തോഷങ്ങള്‍ അലതല്ലുന്ന ദിനം.
മനുഷ്യന്‍ ആശ്രിതജീവിയാണ്‌. ചുറ്റിലുമുള്ളവരോട്‌ അവനു നിരന്തരം ഇടപെടേണ്ടിവരുന്നു. അവരോട്‌ ആനന്ദവും ആധിയും പങ്കുവയ്‌ക്കുന്നു. പരസ്‌പരാശ്രയത്വത്തിന്റെ ഏറ്റവും മനോഹരമായ ഉദാഹരണമാണ്‌ മനുഷ്യജീവിതം. ഈ ജൈവിക യാഥാര്‍ഥ്യത്തെ വലിയ അളവില്‍ അടയാളപ്പെടുത്തുന്നുണ്ട്‌ പെരുന്നാള്‍.........

© Mangalam