മഞ്ഞിന്റെ കുളിരില്‍ ശബരിമല കയറിയെത്തുന്ന ഭക്‌തര്‍ക്ക്‌ ദിവ്യാനുഭൂതി പകരുന്ന രണ്ടു ഘടകങ്ങളുണ്ട്‌. ''നല്ലവഴിയെങ്കളരുളി''വാഴുന്ന സ്വാമി അയ്യപ്പനും മലയാത്രയിലുടനീളം നനുത്ത കാറ്റില്‍ ഒഴുകിയെത്തുന്ന ''ശ്രീകോവില്‍ നടതുറന്നൂ...'' എന്ന ഭസ്‌മത്തിന്റെ ഗന്ധമുള്ള ഗാനവും. സംക്രമസന്ധ്യ സിന്ദൂരം ചാര്‍ത്തുന്ന പൊന്നമ്പലനടയിലെത്തുന്ന അനുഭവമാണ്‌ ഈ പാട്ട്‌ നമുക്ക്‌ പകരുന്നത്‌. ജയവിജയന്മാരുടെ ഏറ്റവും ശ്രദ്ധേയമായ അയ്യപ്പഭക്‌തിഗാനങ്ങളിലൊന്നാണ്‌ 1976-ല്‍ കൈപ്പള്ളി കൃഷ്‌ണപിള്ള രചിച്ച ഈ ഗാനം.
മലയാള ഭക്‌തിഗാനശാഖയിലെ എക്കാലത്തെയും ഏറ്റവും വലിയ ബ്രാന്‍ഡാണ്‌ ജയവിജയന്മാര്‍. രണ്ടുപേരുടെയും സ്വരം വേര്‍തിരിച്ചറിയാനാവാത്ത വിധം അത്രമേല്‍ ഇഴുകിച്ചേര്‍ന്നതാണ്‌. ഇരുവരും ചേര്‍ന്ന്‌ ഈണം നല്‍കി ആലപിച്ച ഗാനങ്ങളത്രയും എക്കാലത്തെയും ഹിറ്റുകളാണ്‌.
കോട്ടയം സ്വദേശികളായ ഗോപാലന്‍ തന്ത്രിയുടെയും നാരായണിയുടെയും ഇരട്ടമക്കളായ ജയനും വിജയനും സംഗീതം ഉപജീവനമാര്‍ഗം മാത്രമായിരുന്നില്ല, നാദാര്‍ച്ചനയായിരുന്നു. ഭക്‌തിയും സംഗീതവും ഒന്നാണെന്നു വിശ്വസിച്ചിരുന്ന സഹോദരങ്ങള്‍ പതിനാറാം വയസുമുതല്‍ സംഗീതത്തിന്റെ വഴിയിലേക്കു തിരിഞ്ഞു. ചെമ്പൈ വൈദ്യനാഥ ഭാഗവതര്‍, ഡോ. ബാലമുരളീകൃഷ്‌ണ തുടങ്ങിയ സംഗീതഇതിഹാസങ്ങളുടെ ശിഷ്യത്വം ജയന്റെയും വിജയന്റെയും ജീവിതത്തിലെ സൗഭാഗ്യങ്ങളുടെ തുടക്കമായിരുന്നു.
ജയനെയും വിജയനെയും 'ജയവിജയ' ആക്കിമാറ്റിയത്‌ നടന്‍ ജോസ്‌ പ്രകാശാണ്‌. ഇരുവരെയും ചേര്‍ത്തുള്ള പേരു നല്‍കിയ ശേഷം ''ഈ പേര്‌ നിങ്ങള്‍ക്ക്‌ ഭാഗ്യം കൊണ്ടുവരും'' എന്ന ജോസ്‌ പ്രകാശിന്റെ വാക്കുകള്‍ പിന്നീട്‌ സത്യമായെന്നത്‌ ചരിത്രം. ജോസ്‌ പ്രകാശ്‌ അഭിനയിച്ച ''പ്രിയപുത്രന്‍'' എന്ന നാടകത്തിനു സംഗീതമൊരുക്കിയത്‌ ജയവിജയന്മാരായിരുന്നു.........

© Mangalam